Ils premis per l'onn 2018 èn vegnids surdads a Berna. Tut ils 19 salvavitas survegnan in diplom d'onur e vitiers datti nov giadas ina medaglia da bronz respectiv d'argient.
Dus policists e trais uffants
Tranter ils undrads èn dus policists da la polizia chantunala da Berna. Els han spendrà l'avrigl 2018 ina dunna che ha vulì far suicidi. La dunna era ida a la staziun da Münsingen sin ils binaris. Ils dus policists han stuschà la dunna giu dals binaris curt avant ch'il tren è arrivà.
Tar ils uffants undrads sa tracti da trais buobs tranter 9 e 14 onns. Trais ulteriuras persunas vegnan undradas per avair spendrà persunas en il traffic or da situaziuns privlusas.
«I va per gidar insatgi auter»
La fundaziun accentuescha en sia communicaziun, ch'ils salvavitas n'hajan ni agì en levsenn ni be vulì la gloria u l'onur. I giaja en quest mument per gidar insatgi auter. Per far quai giajan questas persunas savens en il ristg da perder l'atgna vita.
RR novitads 09:00