Il cusseglier federal Guy Parmelin prenda part al funeral da l'anteriur president franzos, Jacques Chirac. Parmelin è l'unic cusseglier federal che vegn ad esser preschent. La messa per Chirac ha lieu il glindesdi avantmezdi en la baselgia Saint-Sulpice a Paris.
Radund 30 schefs da stadi e da regenza da l'exteriur vegnan spetgads il glindesdi a Paris, tranter quels era il president tudestg, Frank-Walter Steinmeier, il president talian Sergio Mattarella, il president russ Wladimir Putin ed il primminister ungarais Viktor Orban.
Emprim inscunter cun ministers franzos
Guy Parmelin vegn suenter la messa a s'inscuntrar cun la ministra franzosa per furmaziun universitara, perscrutaziun ed innovaziun, Frédérique Vidal, sco er cun il minister da finanzas, Bruno Le Maire.
Tar quest emprim inscunter vai tenor il Departament federal d'economia, furmaziun e retschertga per emprender d'enconuscher in l'auter. Anc il glindesdi vegn il cusseglier federal, Guy Parmelin, a returnar en Svizra.
Jacques Chirac è mort la gievgia passada cun 86 onns. El è stà dal 1995 fin il 2007 president da la Frantscha.
RR novitads 14:00