Sch'insatgi fa l'emprendissadi tar ina banca turitgesa sto el u ella l'emprim far in onn mo a scola – ina scola professiunala spezialisada. Quai è ina part dal nov model d'emprendissadi dall'Associaziun da bancas da Turitg, scriva il «NZZ magazin». La purschida è in supplement a la refurma da l'emprendissadi da commerzi che va en vigur l'auter onn, che n'ha betg plaschì daltuttafatg a l'Uniun da bancas da Turitg. Lezza temeva che las prioritads na cuntentian betg. Enstagl da matematica e tudestg duai l'instrucziun dar pli gronda paisa a las cumpetenzas d'agir dals commerziants e da las commerziantas. Tranter auter emprender da coordinar las lavurs dal mintgadi.
Bancas vulan preparar per matura professiunala
Sch'il nivel da l'emprendissadi saja memia bass, lura na tanschien las cumpetenzas da las emprendistas e dals emprendists betg per suenter pudair far la matura professiunala. Perquai duain tuts ir l'entschatta in entir onn a scola. Il project da pilot saja stà in success, di il mainafatschenta da l'Associaziun da bancas da Turitg Christian Bretscher. Suenter quest onn da scola possian las commerziantas ed ils commerziants lura era surprender incumbensas pli pretensiusas en la banca.
