Radund in terz (34%) dals giuvenils tranter 15 e 29 onns s'orienteschian a medias socialas per furmar ina atgna opiniun. Quai scriva il Bakom il mardi tar il monitor da medias 2019. Medias socialas hajan uschia dapli influenza che radio, medias online, gasettas u la televisiun.
Differenzas datti latiers tranter las diversas regiuns linguisticas da la Svizra: En la Svizra franzosa s'orienteschan 45% dals giuvens a contribuziuns da Facebook, Twitter, Instagram u Youtube. En la Svizra taliana 35% ed en la Svizra tudestga be 30%.
Contribuziuns schurnalisticas online han percunter pers l'attenziun dals giuvenils il 2019. Lur potenzial è sa reducì en media da 20 sin 18%. In'excepziun furma qua la Svizra taliana, nua che 22% dals giuvenils furman lur opiniun cun agid da medias online. L'onn avant eran quai anc be 14%.
