Siglir tar il cuntegn

Header

Ina maisa cun fegls e divers utensils da scriver. In maun scriva inzatge sin in fegl.
Legenda: Emprendistas ed emprendists duain la finala esser ils quals che profiteschan da l'augment qualitativ da la furmaziun professiunala. Keystone
cuntegn

Svizra Furmaziun professiunala dovra in plan a lunga vista

La collavuraziun en dumondas da la furmaziun professiunala tranter Confederaziun, chantuns ed organisaziuns da patruns e lavurants funcziunescha – almain da princip. Tenor la cumissiun da gestiun dal Cussegl naziunal datti potenzial da meglierar.

La collavuraziun en dumondas da la furmaziun professiunala pudess esser meglra, uschia l’avis da la cumissiun da gestiun dal Cussegl naziunal.

Elavurar ina strategia a lunga vista

Da princip funcziuneschia la collavuraziun tranter la Confederaziun, ils chantuns e las organisaziuns da patruns e lavurants, scriva la cumissiun en in rapport. Ils partenaris defineschian finamiras cuminaivlas. Silsuenter sajan las incumbensas dentant repartidas a moda manglusa.

Ord quest motiv cusseglia la cumissiun da gestiun al Cussegl federal d'elavurar ina strategia a lunga vista per la furmaziun professiunala. Quai duai succeder ensemen cun ils chantuns e las organisaziuns correspundentas.

«Organisaziuns da patruns e lavurants»?

In’ulteriura recumandaziun pertutga lura era las organisaziuns da patruns e lavurants. Il Cussegl federal duai sclerir la basa legala da questa noziun e la rolla da las organisaziuns. Da questas organisaziuns fan part – quai tenor lescha vertenta – ils partenaris socials, las associaziuns da professiun, purschiders da la furmaziun professiunala ed autras organisaziuns.

Sco manglus valitescha la cumissiun da gestiun cunzunt la direcziun da la furmaziun professiunala. Ils partenaris lavurian bain ensemen. Però na sajan ils pensums betg repartids cleramain.

La cumissiun spetga dal Cussegl federal ina resposta fin ils 24 da matg 2016.

RR novitads 11:00

sda/alb

Artitgels legì il pli savens

Nach links scrollen Nach rechts scrollen