Tenor in studi èn ils chantuns latins als cunfins ils pli effizients en la Svizra. Sin l'emprim plaz è il Tessin, sin il segund il Vad. Auters chantuns sco il chantun Turitg mussan grondas differenzas sur ils davos diesch onns.
En tut quinta il studi ch'i dess in potenzial da spargnar 12,9 milliardas francs. El calculescha il potenzial da spargn tenor la prestaziun dal chantun il pli effizient. Da spargnar l'entira summa na saja dentant betg pussaivel: I dettia facturs sco la topografia che na fetschian betg cumplettamain cumparegliabels ils chantuns.
Grischun top tar la furmaziun
Almain sch'i va per la furmaziun è il chantun Grischun top dapi il 2019. En il ranking actual dal 2020 è el davant tiers, ensemen cun Appenzell Dadora. Ils chantuns Tessin e Vallais han ils pli effizients fatgs socials.
La furmaziun chaschuna las pli bleras expensas per ils chantuns ed uschia datti er bler potenzial da spargn. Auters fatgs sco cultura e traffic avessan dentant er potenzial da spargnar, i va er là per pliras milliardas francs. Prendì ensemen han l'urden public, la segirezza da vias sco er ils fatgs socials e da cultura fatg or il 2020, 65% da las expensas communalas e chantunalas.