Ils perscrutaders lessan cuntinuar cun lur tests cun furment d’atun transgen uss er sut cundiziuns realas. Finamira da la prova saja tenor l’uffizi federal d’ambient da guardar co che las plantas sa cuntegnan en la natira e sch’ellas portan er là buns resultads.
Meglra prestaziun tras grauns pli gross
Agroscope ha numnadamain gia testà il furment transgen sut vaider. L’intent dals perscrutaders: plantar en l’infurmaziun genetica dal furment in gen da l’ierdi, in uschenumnà gen da transport, per ch’ils grauns vegnan pli gross. Sut vaider haja quai funcziunà, rapporta l’uffizi federal d’ambient. Il furment haja survegni grauns pli gross e purtà uschia 5% dapli prestaziun.
Test cun furment limità sin entant sis onns
Ils tests duajan durar da l’atun 2016 enfin l’atun 2022. L’institut Agroscope sto annunziar mintg’onn a l’uffizi federal d’ambient quant gronda che la surfatscha da test è.
Fertant che la producziun agrara cun plantas transgenas è scumandada fin l’onn 2017 causa in moratori, èsi pussaivel dad implantar ellas per diever scientific. Tar l’Agroscope a Reckenholz vegnan fatg actualmain differents tests en il liber cun plantas transgenas, rapporta l’agentura da novitads svizra sda.
RR novitads 11:00