Siglir tar il cuntegn

Header

cuntegn

Furnir cifras actualas Monitoring duai gidar d'identifitgar stretgas d'electricitad

La Confederaziun n'ha per il mument naginas cifras actualas tar la producziun ed il consum d'electricitad. Fin il december vul l'Uffizi federal d'energia perquai preparar in monitoring.

La Confederaziun survegnia las datas tar il consum d'electricitad cun in retard da plirs mais. Fin quà sajan avant maun las datas fin il matg. Per il zercladur datti calculaziuns approximativas. Quai scriva l'Uffizi federal d'energia. Las cifras davart il consum d’electricitad a partir da l'avust sajan avant maun la fin da december. La raschun per quest retard saja che la digitalisaziun manchia tar las interpresas d'electricitad.

Las cifras actualas gidian da precisar appels da spargnar

Las proximas emnas duai perquai vegnir elavurà in monitoring davart il consum d’electricitad. Tenor l’Uffizi federal d'energia duain quellas integrar las datas actualas da la branscha d’energia. Questas infurmaziuns duain lura vegnir cumbinadas cun la situaziun da provediment en l’Europa sco er cun las datas davart il svilup da l’aura.

Grazia a quest monitoring possian uras u dis critics vegnir renconuschids ordavant. Appels a la populaziun e l’economia per spargnar electricitad possian lura vegnir fatgs cun cleras finamiras. Sumegliant al dashboard durant la pandemia da corona duain questas datas vegnir messas a disposiziun a la publicitad.

La fin d’avust aveva la Confederaziun appellà a l’economia ed a la populaziun da spargnar voluntarmain electricitad per evitar in'eventuala mancanza d’electricitad. Sche questa voluntariadad na basta betg, avess il Cussegl federal da restrenscher contigentar il consum d’electricitad.

RTR novitads 14:00

Artitgels legids il pli savens