Il concern da farmazia e logistica bernais Galenica engrondescha sia fatschenta da farma. Galenica surpiglia il concurrent american Relypsa per passa 1,5 milliardas dollars.
Galenica vul l’auter onn separar la sparta farmaceutica Vifor Pharma. Questa nova interpresa duai lura vegnir quotada a la bursa. La surpigliada vegnia a rinforzar la posiziun da l’interpresa en ils Stadis Unids, argumentescha Galenica. La bursa ha però reagì cun sceptica sin questa annunzia.
