Siglir tar il cuntegn
Inhalt

Svizra Garantir il provediment da forza electrica

Il Cussegl federal duai procurar per impuls d'investir, per segirar la producziun da forza electrica indigena.

Ovra idraulica.
Legenda: Las duas chombras dal Parlament federal pretendan mesiras per promover la producziun da forza electrica indigena. Keystone

Cun 102 cunter 92 vuschs ha il Cussegl naziunal surdà il mardi ina moziun al Cussegl federal che pretenda mesiras per promover la producziun da forza electrica indigena – spezialmain la forza idraulica.

Hans Grunder da la PBD sco represchentant da la cumissiun predeliberanta ha fatg attent, ch'i dovri ils proxims onns enormas investiziuns en implants da forza idraulica. Per segirar l'agen provediment da forza electrica, stoppia la Svizra uss vegnir activa.

Cussegl federal na vul betg ulteriuras subvenziuns

Il Cussegl federal aveva proponì al parlament da refusar questa proposta. La cussegliera federala Doris Leuthard aveva remartgà, che tals impuls per investiziuns muntian nagut auter che ulteriuras subvenziuns. Ella ha avisà a las mesiras da promoziun ch'il Cussegl federal ha fatg en il rom da la strategia d'energia.

Ultra da quai haja il parlament decidì ina premia da martgà en l'autezza da 120 milliuns francs per ovras electricas grondas che na rendan betg. Dapli na dovria quai betg. Uss ch'il pretsch per forza electrica sa revegnia puspè, stoppia il martgà regular la dumonda e la purschida.

RR novitads 12:00