Avant duas emnas avevi anc num, che la Somedia haja cumprà la gasetta «Fridolin». Uss vesa quai dentant or auter. Ma davent da l’entschatta: Cumenzà ha tut cun problems finanzials da la gasetta «Fridolin» che vegn dada ora gratuitamain ed ha in dumber d’ediziun da 32’000 tocs. «Fridolin» saja numnadamain stà en il moratori, «Nachlassstundung» per tudestg. Quai vul dir ch’ella ha survegnì temp per evitar in concurs e sustegn d’in curatur dal tribunal.
Sco che la Somedia ha scrit en in agen artitgel saja vegnida fundada ina nova fatschenta cun il num «Fridolin Medien AG» che agescha sco editura. Quai n'è betg l’unica gasetta che la Somedia posseda en la Glaruna: er il radio e la televisiun regiunala e la gasetta «Glarner Nachrichten». La cumpra è era vegnida approvada dal tribunal chantunal Glarunais.
La communicaziun da la Somedia
Via davant dretgira
Il manader da la chasa editura Fridolin Druck und Medien Walter Feldmann SA ha gì da bandunar la fatschenta, quai ha decidì il tribunal chantunal. Cunter sia relaschada ed era cunter la cumpra da la Somedia ha il mainafatschenta purtà plant.
Cun quest plant ha el gì success ed il tribunal superiur ha fatg in decret superprovisoric – vul dir che tut resta sco avant: Il mainafatschenta resta e la cumpra da la Somedia è nunvalaivla. Al medem mument s’ha allegrà in terz: Bruno Hug, el è editur dal portal online Linth24. El ed auters investurs han dà in mez milliuns francs, cun l'interess da cumprar «Fridolin». Sco ch’el ha ditg envers il portal persoenlich.com na vesa el sasez anc betg sco possessur, el spetga sin la decisiun dal tribunal.
La Somedia s’è dustada encunter questas novas vieutas en il cas. Lur arguments:
- L’offerta da la Somedia saja economicamain meglra. Numnadamain han els pajà 275’000 francs e surpiglian anc debits da la veglia chasa editura dal «Fridolin». Tut en tut sajan quai tenor il CEO da la Somedia, Thomas Kundert 875’000 francs.
- La Somedia haja in dretg da precumpra al «Fridolin». Quai vegn da pli baud cura ch’ella ha vendì las «Obersee Nachrichten» e tegnì ferm en il contract, che la gasetta «Fridolin» na po betg vegnir vendida senza il consentiment da la Somedia.
Spetgar sin decisiun finala
Tenor Thomas Kundert haja questa dispita chaschunà in chaos giuridic ed operativ. Era sche la gasetta «Fridolin» cumpara mumentan anc, na sappian ins betg co ch'i giaja vinavant. Er ils collavuraturs e las collavuraturas na san betg quai. Els han actualmain dus contracts da lavur: quel cun il patrun da lavur vegl e cun la Somedia. L’unica opziun è da spetgar sin la decisiun dal tribunal. Thomas Kundert quinta, che quai pudess durar pli ditg e forsa er ir fin davant Tribunal federal.
