Ch'i dat stretgas sin il martgà da palpiri percorscha er la chasa editura Somedia, di il manader da la sparta logistica d'ediziun Jan Hofer. Il mument spargnian els palpiri cun desister d'ediziuns supplamentaras u da reserva. Reducir tar lur products da print stoppian els anc uss betg, uschia Hofer. Enfin la fin da l'onn na tanschian las reservas dentant betg.
Gasettas grondas en Svizra sco la NZZ, Tamedia e CH Media avevan annunzià ch'ellas stoppian reducir il volumen e vegnian pli finas pervia da la stretga da palpiri. Las gasettas vegnan a reducir il volumen davent da mardi fin la fin d'october.
Brischament impedescha furniziun
Il palpiri per gasettas è stgars, cunquai ch'igl ha brischà l'emna passada en la fabrica da palpiri a Perlen en il chantun da Lucerna. Quella fabrica furnescha il palpir ad ina gronda part da las chasas edituras da gasettas en Svizra. Dapi l’incendi possia la fabrica furnir damain. En pli manchia il palpiri actualmain en l'entira Europa, quai pervi d'ina stretga tar la materia prima.