Dapli lecturas e lecturs ha tenor las cifras novas da la WEMF l'ediziun cumplaina da la Südostschweiz, che cumpiglia er il Bündner Tagblatt e la Quotidiana. 5'000 lecturs dapli, cumpareglià cun l'onn avant, han legì las gasettas da la Somedia. Totalmain legian 171'000 persunas mintga di la «Südostschweiz» – uschè bleras sco anc mai en la cumposiziun actuala.
Il pli savens vegn legì «20 Minuten»
Er autras gasettas regiunalas en Svizra han levamain dapli lecturs, uschia la Luzerner Zeitung e la gasetta da la Svizra franzosa «Le Temps». Sch'ins resguarda ils lecturs da las ediziuns sin palpiri ed online ensemen, resta «20 Minuten» vinavant a la testa cun 3,2 milliuns lecturs. 1,924 milliuns e cun quai dapli che la primavaira, legian la gasetta stampada e 1,286 milliuns per di fan diever da la purschida online.
... e suenter il Blick
Il Blick sco segund ha anc 1,1 milliuns lecturs mintga di. E cun 747'000 utilisaders per di è il Blick il sulet medium che ha dapli lecturs online che tar l'ediziun stampada.
RR novitads 06:00