Siglir tar il cuntegn

Svizra Gea al barat d'infurmaziuns automatic

Il Cussegl naziunal è da princip d'accord che la Svizra duess furnir automaticamain infurmaziuns als pajais d'origin dals clients da banca da l'exteriur en Svizra. El ha decidì da discutar las premissas legalas.

La Svizra stoppia far in passa enavant, uschia la Cussegliera federala Eveline Widmer-Schlumpf.
Legenda: La Svizra stoppia far in passa enavant, uschia la Cussegliera federala Eveline Widmer-Schlumpf. Keystone

Questa decisiun saja in mument istoric, han plirs cussegliers da la sanestra ditg. Uss saja il secret da banca mort. Cunter il barat automatic d'infurmaziuns è la Partida populara svizra s'exprimida. Sia proposta d'insumma betg entrar en materia n'ha dentant gì nagina schanza.

Datas accesiblas per ils uffizis da taglia

In emprim detagl dispitaivel da la debatta è stà co tractar datas che las autoritads svizras survegnan d’auters stadis. Quai èn datas da contos da banca da persunas ch’èn obligadas da pajar taglia en Svizra e che possedan contos en l’exteriur.

La PPS vuleva limitar u impedir ch’ils uffizis da taglia svizzers possian duvrar questas datas, damai ch’il secret bancar vala vinavant entaifer la Svizra. Il Cussegl naziunal ha refusà quai cun in resultat fitg stretg.

Amnestia per daners nairs

Acceptà ha il Cussegl naziunal percunter ina dumonda da Fabio Regazzi (PCD/TI) per in’amnestia fiscala. La proposta duai animar persunas ch’han defraudà da declerar lur daners nairs.