Siglir tar il cuntegn

Svizra Gea al barat d'infurmaziuns automatic cun l'UE e cun l'Australia

La Svizra dastga barattar en l'avegnir regularmain infurmaziuns davart contos da banca da burgais da l'UE e da l'Australia cun l'UE e cun l'Australia. Suenter il Cussegl dals chantuns ha ditg oz cleramain gea era il Cussegl naziunal a las duas cunvegnas davart il barat d’infurmaziuns automatic.

bandiera da la UE davosvart e davantvart quella da la Svizra
Legenda: Il barat da datas automatic cun l'UE e cun l'Australia è sut tetg. Keystone

Entant cha la cunvegna cun l'Australia era pli u main incontestada, s'ha dostada la PPS cunter la cunvegna cun l'UE. Thomas Matter dal PPS ha pretais ch'i vegnia inscrit en la cunvegna ch'i na dettia betg in barat d’infurmaziuns automatic cun pajais che n’hajan betg ina regulaziun faira. La proposta da renviada dal PPS n'ha però gi naginas schanzas en la chombra gronda.

Era la resalva dal PPS che questas duas cunvegnas duessian pir vegnir realisadas suenter che tut tschels lieus da finanzas sin quest mund hajan introducì il barat d’infurmaziuns automatic, n’ha betg chattà ina maioritad en il Cussegl naziunal.

Il Cussegl naziunal ha ditg gea al barat d’infurmaziuns automatic cun l'Australia e cun l'UE cun 122 a 58 vuschs ed 8 abstenziuns. Las cunvegnas entran en vigur ils 1. da schaner 2017. A partir dal 2018 duessan lura vegnir barattadas emprimas datas.

RR actualitad 17:00