Siglir tar il cuntegn

Header

cuntegn

Generation What Generation What? – Generaziun optimistica!

L'Uniun da radio europeica di che la generaziun d'oz saja la generaziun da l'optimissem. Tge dovran ils giuvenils dentant per pudair esser optimistics? Co pon ins esser optimist en in temp da crisas da fugitivs, da finanzas e cun la tema dal terrorissem?

Ils giuvenils en l'Europa vulan en emprima lingia avair schanzas gistas. Els vulan viver independentamain e vegnir prì serius da lur visavi. La stabilitad e segirezza giogan er ina rolla impurtanta per els.

audio
Mezdi: Generation What? – tge din ils sociologs?
ord Actualitad dals 18.11.2016.
laschar ir. Durada: 3 minutas 37 Secundas.

Sche la politica en il pajais po procurar per quai, èn ils giuvens pli optimistics. Segirezza vulan els en in temp da crisa dentant er finanzialmain. Cun lezza pon ins sviluppar plans ed ideas senza temas.

Er tar l'emprender vulan ils giuvens sa sentir segirs. Sch'els chattan d'esser stads en buns mauns durant il temp da scola, èn els pli optimistics. En l'Europa vulan ins vegnir educà per la vita e na betg per la scola.

Co ticcan ils Svizzers?

In dals puncts nua ch'ils giuvenils Svizzers crodan or pli negativ che la media europeica è ch'ils giuvenils èn da l'opiniun che la generaziun precedenta è la culpa da la situaziun actuala. Els èn er da l'avis ch'il stadi maldovri per part ils daners ch'ins sto pajar en (taxas). Plinavant è la tema d'ina crisa economica pulit gronda tar ils giuvenils. Er ina gronda influenza negativa sin l'optimissem dals giuvens Svizzers ha la tema d'examens.

Cuntents cun la lavur

En dus puncts è la Svizra pli auta che la media europeica. Cun la lavur èn ils giuvens Svizzers cuntents. Els èn er da l'opiniun d'avair chattà lavur che correspundia a lur abilitads e qualificaziuns. Quai è puspè in punct che porta optimissem. Pertge uschia na ston ins betg temair da daventar malcuntent.

Ca. 5'000 Svizzers han respundì

Fin uss na datti anc naginas cifras definitivas, cunquai che l’enquista cuntinuescha.

Dals 30 pajais participants han en tut passa 600’000 persunas respundì al questiunari online. En Svizra han en media radund 5’000 persunas respundì a las singulas dumondas.

Il rapport final è planisà per l’entschatta dal 2017.

RR actualitad 11:00

Artitgels legids il pli savens