Siglir tar il cuntegn

Header

cuntegn

Generation What Has era gia fatg baracca cun ils geniturs?

«Gea», di bunamain mintga segund svizzer, ni pli precis da quai da 47% da 3'000 giuvnas e giuvens. Els èn gia sa participads al pli grond selfie statistic da l'Europa: la retschertga online «Generation What?». En Svizra è ella vegnida lantschada uss per propi.

En curt: Generation What?

Avrir la box Serrar la box
Legenda: generation-what.ch

Lavur, famiglia, amis, amur, sex e politica. Tar la retschertga vai per dumondas davart las pli impurtantas chaussas da la vita. I dat 4 categorias da vegliadetgna: 16-17, 18-25, 26-34 e 34 e pli vegl. La retschertga dat uschia ina invista detagliada en la vita da – fin uss – passa 505'000 giuvnas e giuvens da 27 pajais europeics.

Dentant - ils geniturs svizzers paran dad esser raschunaivels: dals sut 18 onns respunda mintga tschintgavel, ch'el haja bavì sturn cun ses geniturs. Suenter 18 sa mida quai tenor las respostas da las giuvnas ed ils giuvens en la retschertga online: enfin 34 ha quasi mintga segund fatg ina giada baracca cun ses geniturs.

In selfie gigantic da la giuventetgna europeica

Respundì a questa dumonda n'han betg mo Svizras e Svizzers mabain passa 505'000 giuvnas e giuvens en 25 pajais europeics. Els èn gia sa participads a la retschertga online da «Generation What?» ed han pussibilità uschia da survegnir emprimas respostas sin la dumonda: Tgi èn ils giuvens e las giuvnas en Europa?

E tge dias ti?

Far baracca cun ils geniturs - in tema da la Svizra fin en l'Irlanda

La retschertga pussibilitescha per l'emprima giada insumma da chattar respostas sin questa dumonda ed oravant tut da congualar co ch'ils giuvens e las giuvnas en Europa funcziunan.

En la dumonda dal baiver sturn mussa «Generation What?» ch'ils giuvens e las giuvnas en Irlanda èn bain in zichel differents als giuvens en Svizra: en Irlanda respundan quasi duas terzas da quels che han respundì (16 - 34 onns), ch'els hajan gia ina giada fatg la sturna cumpletta cun ils geniturs. Guardai qua sut!

Sa participar al questiunari - dapli che mo in gag

Per ils giuvens è «Generation What?» ina schanza da far udir lur vusch. Per la politica internaziunala vegni ad esser la schanza u era la sfida dad ir enturn cun quai ch’ella vegn ad udir da questa retschertga.

Che la politica vegn a s’interessar mussa l’exempel da la Frantscha. La retschertga franzosa «Generation Quoi», il model per «Generation What?», ha influenzà debattas politicas e process legislativs.

La finamira da la retschertga è ambiziusa: fin in november spetga ella respostas da passa in milliun participantas e participants.

En Svizra han respundì enfin uss passa 2'800 persunas. Cunquai che la retschertga vegn manada vinavant sa midan las cifras cuntinuadamain.

Artitgels legids il pli savens