Curt e concis
- 1'531 persunas han prendì part al studi dal project Voto
- In ferm service public en tuttas regiuns e l'SRG eran ils motivs che l'iniziativa No Billag ha fatg uschè cler naufragi
- Il pli cler na a l'iniziativa No Billag ha ditg la «generaziun Netflix»
- Malgrà che l'iniziativa è vegnida renviada èn 58% da l'avis che la SRG SSR è memia gronda e sto reducir sia purschida
60% da las votantas e dals votants n'han betg cartì che la SRG/SSR possia exister vinavant senza taxas da la Billag. Il mantegniment d'in ferm service public en tuttas regiuns da la Svizra en general e la SRG SSR en spezial eran ils motivs principals che l'iniziativa da la No Billag ha fatg uschè cler naufragi.
Sulet simpatisantas e simpatisants da la Partida populara svizra PPS han detg stgars gea a l'urna. Era sche l'iniziativa ha fatg cleramain naufragi a l'urna, giavischan 58% dals votants che la SRG SSR sa refurma e reducescha sia purschida. Quai tenor ina analisa da 1'531 persunas cun dretg da votar ils 4 da mars 2018. Il studi è vegnì fatgs da FORS, ZDA e da l'institut d'enquista LINK, finanzià il studi ha la Chanzlia federala.
Il pli cler era il na a l'iniziativa da la No Billag tar ils Verds, la Partida socialdemocratica, la Partida verd-liberala e la Partida cristiandemocratica cun tranter 90% ed 84% na.
«Generaziun Netflix»
En il cumbat electoral è fitg savens la generaziun Netflix vegnida numnada e gist quella ha ditg il pli cler na a l'iniziativa. Sur tuttas categorias da vegliadetgna han ils votants tranter 18 e 29 onns ditg il pli pauc gea, sulet 20% èn stads per l'iniziativa.
La SRG SSR giauda en l'entira Svizra gronda confidenza: 73% han gronda u fitg gronda confidenza. Plinavant han 70% ditg ch'els fan diever dal program da televisiun e da radio mintga di. 69% han giuditgà il program sco bun fin fitg bun.
Arguments pro e contra en la debatta No Billag
| argument | perencletg | betg perencletg | na sai betg |
| L'SRG è vegnida memia gronda e chara. Ella sto reducir sia purschida. | 58% | 37% | 5% |
| Naginas taxas obligatoricas. Mintga burgais duai decider sez per tge ch'el vul pajar. | 38% | 59% | 2% |
| L'SRG è impurtanta per l'uniun naziunala e la solidaritad cun tuttas regiuns linguisticas. | 86% | 12% | 2% |
| La dismessa da las taxas No Billag mainan tar ina dependenza d'investiders privats. Quai periclitescha l'independenza politica da las contribuziuns. | 66% | 30% | 4% |
RR novitads 11:00