Svizra - Gia 28 infecziuns da Zika en Svizra quest onn
Dapi l'entschatta da l'onn èn 28 persunas vegnidas infectadas cun il virus da Zika en Svizra. Per persunas che van als gieus olimpics a Rio valia perquai d'esser precaut da morsas da mustgins, scriva l'uffizi federal per la sanadad.
Precauziun vala però er en ulteriurs pajais da l'America Latina e la Caribica. Il virus da Zika sa derasa dapi il matg da l'onn passà en l'America Latina. La Brasilia tutga dentant tar ils pajais ch'èn pertutgads il pli fitg. En Svizra vala dapi mars in obligatori d'annunziar infecziuns cun il virus.
