La Svizra saja oz in dal pajais ils pli bainstants dal mund. Ils ultims decennis saja la ritgezza creschida fermamain en Svizra. Il problem saja simplamain che mo ina pitschna part da la populaziun haja propi pudì profitar da quai svilup, di la cussegliera naziunala Sandra Locher Benguerel (PS). L'iniziativa 99% possia qua puspè procurar per dapli egualitad.
Nus avain ussa in sistem da taglia malgist. Las entradas che jau survegn tras mia lavur èn suttamessas ad ina taglia pli auta che entradas tras gudogns cun aczias u dividendas. Qua avain nus ina gronda inegualitad.
Dapli egualitad
L'iniziativa vul midar quai. Ella vul che gudogns ord dividendas ed aczias u er entradas da locuziun che surpassan ina tscherta summa, tenor ils iniziants 100'000 francs per onn, duain vegnir taxadas pli aut. Concret 1,5 giadas dapli. Las entradas supplementaras duain ir a favur dal bainstar social dal qual cunzunt las persunas cun pajas bassas u mesaunas duain profitar.
I saja schon uschia ch'ils ritgs vegnian adina pli ritgs, era en Svizra, conceda la cussegliera naziunala Anna Giacometti (PLD). L'iniziativa 99% na vegnia dentant betg a schliar quest problem, è ella persvasa. I dettia memia bleras dumondas avertas. I na saja per exempel betg definì exact tge che 'entradas ord chapital' sajan insumma.
Èn quai era entradas da locuziun u entradas ord la cassa da pensiun? Quai na savain nus eba betg ed igl è insaco formulà nuncler. Sche jau pens ch’il parlament duess lura sclerir questas dumondas, lura ma fatsch jau gronds quitads schi dat lura propi in bun resultat.
In privel per plazzas da lavur
Sper quai pudess in Gea a l'iniziativa era far donn a la plazza economica svizra e periclitar plazzas da lavur. Interpresas na prospereschian betg simplamain uschia.
Ellas dovran chapital e liquiditad per pudair investir e pudair crear plazzas da lavur. E sch’ins prenda davent ad ellas anc dapli daners tras las taglias, mancan quels daners per investiziuns e plazzas da lavur e quai na fiss insumma betg en il senn dals lavurants.
Quai na saja era betg il problem, respunda Sandra Locher Benguerel. L'iniziativa prendia en emprima lingia en mira ils super ritgs, quai 'in pertschient' che sesia en Svizra sin passa 40% da tut il possess. Quels na vivian betg da la lavur, mabain da la speculaziun.
Funtauna d'entradas gista
I na saja perquai nagut auter che gist ch'era quellas persunas contribueschian al bainstar da l'entira populaziun. Gist ussa, en la crisa da corona, nua che la Confederaziun haja investì blers daners per mantegnair interpresas e fatschentas e cun quai era plazzas da lavur. Quels custs stoppian ins era cumpensar insaco.
L’iniziativa mussa co nus vegnin a moda gista tar ina nova funtauna d’entradas, sco nus pudain era sustegnair nossas instituziuns socialas, gist actual per exempel l’AVS. Nus duvrain novas funtaunas d’entradas e quai fiss tenor mes giuditgar ina funtauna d’entradas gista.
Gie u na a l'iniziativa 99%? – Las votantas ed ils votants decidan ils 26 da settember a l'urna.