L'idea da suttametter ils gieus olimpics al referendum n’è betg nova. Gia il mars aveva la Cussegliera naziunala socialdemocrata Silva Semadeni gì da defender sia moziun che leva che las votantas ed ils votants svizzers possian decider davart la milliarda francs ch'il Cussegl federal leva dar per sustegnair ils gieus olimpics da Sion 2026. Ina maioritad dal Cussegl naziunal aveva lura dà suatientscha a quella. Perquai che la populaziun vallesana ha decidì il zercladur cunter ils gieus ha quella moziun uss nagina muntada pli.
Mo Silva Semadeni na vul betg sa cuntentar cun quai success. Ella patratga gia vida futuras iniziativas per gieus olimpics en Svizra. «Igl è pussaivel ch’i dat puspè iniziativas per gieus olimpics. E sche quellas vegnan ston ils organisaturs savair co las reglas èn. Ina regla impurtanta fiss ch’i dovra in referendum facultativ a nivel svizzer.»
Semadeni na saja betg cunter gieus olimpics
Cuntanscher quai vul ella cun sia iniziativa parlamentara. Cun quella propona ella d'agiunscher a la lescha federala per la promoziun dal sport in ulteriur paragraf che pretenda gist quai, in referendum facultativ sch’i dat daners da la Confederaziun.
Ella na saja betg categoricamain cunter gieus olimpics en Svizra, sincerescha Semadeni. Perquai na pretendi ella era betg in referendum obligatoric.
Sch’ils gieus fissan uschè sco quai ch’i vegn adina detg, ch’els sajan pitschens, duraivels e persistents, lura na fiss necessari da far in referendum.
Ella saja dentant cunter excess nua che la fin finala tant ils lieus d’occurrenza e la populaziun sco era la natira vegnian sut las rodas. Tar gieus massa gronds, massa chars e cun grondas investiziuns dal maun public stoppia pudair vegnir decidì er al nivel svizzer, di Semadeni.
Swiss Olympic di "Gea, dentant..."
Critic vesa Alexander Wäfler da Swiss Olympic l'iniziativa parlamentara da Semadeni. Era per els saja cler ch'ina candidatura per gieus olimpics dovri in ferm sustegn da la populaziun. Da l'autra vart n’enconuschi la Svizra nagin referendum da finanzas. I fiss perquai schon curius sch'ins faschess ussa gist tar il sport in'excepziun. Quai tant pli ch'ina candidatura da la Svizra na saja per ils proxims onns insumma nagin tema.
Davart l’iniziativa parlamentara decida il Cussegl naziunal en ina da las proximas sessiuns.
RR actualitad 07:10
