Il Cussegl federal na trametta nagina delegaziun uffiziala als gieus olimpics d'enviern a Bejing. Quai ha decidì il Cussegl federal ed argumentescha cun la situaziun malguessa da la pandemia. Tras las mesiras cunter la derasaziun da la pandemia na pudessia ina tala delegaziun far nagins inscunters bilateralas substanzials a l'ur dals gieus, ed era avair nagins contacts cun atletas ed atlets. La Svizra vegnia però ad esser preschenta cun lur ambassatur el lieu.
Ils gieus olimpics d'enviern han lieu a Bejing dals 4 fin ils 20 da favrer. Ed era tar quest eveniment duain participantas e participants restar en ina «bubble» (ina borla) isolada da lieu, per evitar ch'els importeschian il virus en la China.
Plirs stadis boicotteschan ils gieus
Plirs stadis han clamà al boicot dals gieus olimpics a Bejing e na tramettan naginas delegaziuns uffizialas. Ils Stadis Unids da l'America avevan proponì da spustar ils gieus olimpics sco critica che la China na respectia betg ils dretgs umans. Tranter auter renfatschan ils USA a la China da genocid vi da la minoritad muslima dals Uigurs. L'Australia, la Nova Zelanda, la Gronda Britannia, il Canada ed il Giapun èn s'associads al boicot, entant che la China ha renvià las reproschas.
