La dumengia ha gì lieu la cumpetiziun da teams ad Aarau. A l'entschatta da la cumpetiziun chaminan tut las gimnastas ensemen en sala. Là vegn alura mintga team bainvegnì. Enturn ed enturn han giubilà ils fans cun applaus, cloms e bandieras.
Da la partida era il team Grischun da la categoria 6 cun tschintg gimnastas ch'èn sa qualifitgadas durant la stagiun cun lur bunas notas. Tranter ellas Alina Püntener da Samedan che fa per la segunda giada part dal team Grischun tar ils campiunadis svizzers. Ella fa gimnastica per il TZ Engiadina.
La collega da team, Fabia Niggli ch’è era da Samedan è la gimnasta da reserva per il team Grischun. Ina terza rumantscha è Mara Blumenthal che fa gimnastica per il TV Panaduz. Per ella èn quests campiunadis svizzers stads ina gronda finamira da la stagiun.
Ils campiunadis svizzers funcziunan medem sco las cumpetiziuns durant la stagiun. A quatter urdains mussa mintga gimnast e gimnasta sia prestaziun cun ils elements tschernids che correspundan a la categoria. Quai al sigl, al rec, al funs ed als rintgs.
Spezial a quest punct culminant è, ch'in team va a la partenza. Las meglras quatter notas vegnan quintadas. La pli auta nota è in da diesch. Mintga sbagl, tremblada, passin u ina chomma che n’è betg stendida dat intgins dieschavels subtracziun.
Durant las duas uras cumpetiziun èn Alina Püntener e Mara Blumenthal cun il team Grischun sin la plazza da cumpetiziun. Lur dress ha las colurs da la vopna dal Grischun e si duas cornas dal capricorn. La damaun baud durant sa stgaudar èn tuttas duas dunnas giuvnas da 16 e 17 onns gnervusas. Alina Püntener surtut pervi dal urdain rec.
E Mara Blumenthal pervi dal sigl. Ella na saja en sasez betg uschè schleta, ma ella na fa betg uschè gugent il sigl perquai ch'i saja per ella grev mentalmain. Sch'ins vegnia or dal trampolin na poss'ins betg pli midar insatge.
Suenter las preschentaziuns dals teams cun grond applaus per tut ils chantuns èsi pli quiet en la halla da gimnastica. Il team grischun ha cumenzà al sigl. La meglra prestaziun han Mara Blumenthal sco era Alina Püntener mussà al funs. Dentant han era las rutinas als auters urdains funcziunà bain. Ed a la fin hai dà rang 10 per il team Grischun.