En Svizra vegnan fatg regularmain tractaments ginecologics nunnecessaris, scriva la Societad svizra per ginecologia ed obstetrica. Ella ha publitgà ina glista cun ils top-5 tractaments che n'èn betg necessaris or da lur punct da vista. Tranter auter èn quai il sfrusch dal cancer annual e dad adina dar antibiotica tar inflammaziuns da la vaschia.
Per pussibilitar als pazients da discutar davart quests temas vegnia la glista er publitgada en lingua chapibla per laics.
Ils auters trais tractaments nunnecessaris sin la glista èn scleriments d'ormons regulars en cas da difficultas cun il climacteri, tractaments nungiustifitgads da mioms u perfin l'allontanament dal uterus pervi da mioms. E sco l'ultim punct da la glista è l'allontanament chirurgic da cistas, ovarias che n'èn betg malignas e na causan betg malessers.
Tenor la societad purtadra «smarter medicine» èn tractaments nunnecessaris betg be derasads en la ginecologia. Studis dal temp avant corona mussian, che 20 fin a 30% da las intervenziun medicinalas en Svizra na sajan betg necessarias.