Il Prix Walo vala sco la pli impurtanta distincziun en il showbusiness da la Svizra. Il premi vegn surdà dapi il 1974. Fundà il premi ha il musicist e manader d'orchester Walo Linder (1905-1979). Da lez temp aveva el anc num «Goldener Tell». Numnà enturn en Prix Walo è el vegnì l'onn 1980.
- Il premi sco meglra producziun da televisiun ha survegnì la seria da crimi da SRF «Wilder».
- L’actura principala Sarah Spale è vegnida undrada sco meglra actura.
- Il premi per la meglra producziun da film ha gudagnà «Die göttliche Ordnung» da Petra Volpe.
- Premis hai era dà per differents musicists: En la sparta «Pop/Rock» ha Kunz gudagnà il Prix Walo. Gia il 2012 aveva el survegnì la distincziun per meglier newcomer.
- Nagin Prix Walo per ils Fränzlis da Tschlin. L'accordeonist Martin Nauer ha gudagna il premi en questa sparta, la musica populara.
- Newcomer da l’onn è il rapper da Bienna, Nemo.
- Sco preferì dal public è vegnì undrà l’actur Stefan Gubser.
- Il chantautur Peter Reber ha gudagnà il premi per sia ovra da vita.
- «The Show Must Go Wrong» sut la regia da Dominik Flaschka gudogna sco meglra producziun da tribuna.
- Helga Schneider gudogna en la sparta cabaret/comedy.
Moderà è la surdada dal Prix Walo vegnida en ils studios da tpc a Turitg-Leutschenbach da Monika Kaelin, presidenta da la scena da show Svizra ensemen cun Nicol Berchtold e Salar Bahrampoori.
RR novitads 06:00