Suenter l'inquisiziun penala, che ha cuzzà passa sis onns tar il Tribunal penal federal, ha la procura publica federala uss purtà plant encunter il minister da l'intern dal 2006 fin il 2016 da Gambia, ha communitgà la procura.
A Sonko vegn renfatschà ch'el haja sustegnì, saja sa participà e na saja betg sa mess cunter a las repressiuns violentas da las forzas da l'armada dal president Yahya Jammeh. Quai a moda sistematica ed extendida. Las renfatschas sa refereschan sin la perioda da temp dal 2000 fin il 2016 e duain sa concentrar sur tut sin ils delicts en connex cun la violaziun dals dretgs umans. Sonko duai esser responsabel per tortura entras la polizia e persunal da praschuns sco er gruppas che sajan stadas affiliadas a quels.
Vivì en alloschi per requirents d'asil a Lyss
Pir avant intginas emnas ha il Tribunal penal federal refusà in recurs da Sonko encunter ina dumonda d'assistenza giudiziala da la Germania. La procura publica generala da la Germania investighescha er encunter persunas che han cuntrafatg als dretgs umans durant ch'il president Jammeh è stà a la pussanza fin il 2017.
Avant l'arrestaziun ha Sonko vivì intgins mais sco requirent en in center transitoric per requirents d'asil a Lyss en il chantun Berna. L'organisaziun nunguvernamentala Trial International aveva lura purtà plant e Sonko è dapi il 2018 en arrest d'inquisiziun.