Siglir tar il cuntegn

Svizra Giuven student da Turitg rimna daners per Quadroni

Suenter che l'informant Adam Quadroni è sortì dal cartel da construcziun ha el pers sia fatschenta. Uss less in student da Turitg gidar el cun in'acziun da crowdfunding.

Screenshot da pagina da crowdfunding.
Legenda: Sin ina pagina online rimna il giuven student ils daners. wemakeit.ch

Tochen il 2006 è el sa participà sez al cartel en la branscha da construcziun. Suenter ha Adam Quadroni gì avunda ed è sortì da quel. Consequenza è stada ch'el ha pers sia fatschenta. Plinavant ha er sia dunna bandunà el. In student da Wald en il chantun Turitg less uss gidar l'informant Adam Quadroni cun rimnas daners via crowdfunding.

Engaschi per giustia

Il student Nathanael Wildermuth di ch'el vul gidar Adam Quadroni e s'engaschar per giustia. Finamira saja da rimnar almain 100'000 francs sin sia plattafurma online. Sustegnì vegn el da Giusep Nay. L'anteriur derschader e president dal Tribunal federal surprenda la controlla da las finanzas dal project. Plinavant ha Quadroni survegnì gratuitamain ses cussegl giuridic. Uschia survegn Adam Quadroni sustegn finanzial per ina nov'entschatta e sustegn per cumbatter avant dretgira ch'el dastgia vesair dapli sias figlias.

RR actualitad 17:00