Ils giuvenils pateschan ferm da las mesiras da corona. Quai demussan las cifras da l’Ospital d’uffants da Turitg. L’onn passà sajan marcantamain dapli giuvenils vegnids tramess en l’ospital suenter ch’els hajan empruvà da far suicidi. Il dumber saja s’augmentà da 22 sin 49. Ils uffants sajan fitg desperads, ha declerà Markus Landolt da l’Ospital d’uffants da Turitg en in’intervista cun la «NZZ am Sonntag». Els rapportian da situaziuns famigliaras fitg difficilas, da grevs conflicts e da violenza.
Disturbis da mangiar e dissociativs
Ultra da quai dettia er dapli giuvenils cun disturbis da mangiar e cun disturbis dissociativs. Pertutgadas e pertutgads na sentian tuttenina betg pli endretg lur corp u na possian betg pli mover tschertas parts. L’ospital n’haja betg mo dapli tals pazients, els stettian er pli ditg. I saja strusch pussaivel da chattar plazs per il tractament psicologic posteriur. La situaziun da provediment saja catastrofala, uschia Landolt vinavant. Cunzunt giuvnas sajan pertutgadas. Ils giuvens percunter externaliseschian lur problems pli savens e vegnian agressivs.
