Siglir tar il cuntegn

Svizra Glencore cun dapli svieuta e gudogn

L'emprima mesadad da l'onn ha il concern da materia prima augmentà la svieuta per 5% sin 108,6 milliardas dollars.

La sedia da Glencore a Baar.
Legenda: La sedia da Glencore a Baar. Keystone

Il gudogn da Glencore è schizunt anc creschì pli fitg cumpareglià cun la medema perioda da l'onn passà, numnadamain per 13% sin 2,78 milliardas dollars. Quai ha communitgà il concern cun sedia a Baar en il chantun Zug.

Cunzunt creschidas sajan las spartas da metal e da minerals, sco er las spartas da charvun e da products da petroli, ha communitgà Glencore.

Las prognosas per l'entir onn da fatschenta èn tenor Glencore optimisticas. Il proxim temp veglia il concern cunzunt reducir ils debits, augmentar la rendita dals acziunaris e cuntinuar cun il program da cumprar enavos aczias. Quai ha communitgà il schef da Glencore, Ivan Glasenberg.