Dasper la part uffiziala da l’inauguraziun dal tunnel datti er ina purschida culturala e culinara. Cun radund 600 acturas ed acturs ha il reschissur da teater Volker Hesse inscenà in spectacul davart il mitus «Gottard» ed il tunnel fitg modern che fa impressiun als giasts.
Ultra da quai embelleschan musicists, la musica da l’armada e chors locals la festa. Ad omadus portals pon ils giasts er giudair spezialitads regiunalas.
Festa dal pievel
La fin d’emna èn lura las portas avertas per la populaziun. I dat festa en quatter lieus – ad Erstfeld, a Rynächt, al portal dal nord ed a Pollegio, ed a la staziun da Biasca al portal dal sid. Ils organisaturs quintan cun in grond interess da la populaziun. Radund 50’000 – 100’000 persunas duajan ir cun il tren tras il tunnel da 57 kilometers lunghezza.
Benedicziun dal tunnel
Da las 8:30 han cumenzà las festivitads per l'inauguraziun dal tunnel da basa dal Gottard, quai cun la benedicziun da l'implant. Spirituals da trais religiuns han fatg da cuminanza ina ceremonia en il culm avant l’inauguraziun uffiziala. In pader, ina plevonessa, in imam ed in rabin han fatg oraziun ensemen per ils viagiaturs e lavurers dal nov tunnel. Er in ateist è stà da la partida. Per motivs da segirezza n’è la ceremonia betg stada en il tunnel sez, mabain en l’uschenumnà tunnel da model.
Blera prominenza a l'avertura
Per las festivitads èn envidads - sper l'entir Cussegl federal - enturn 1'100 giasts. Tranter quels èn er la chanceliera tudestga Angela Merkel, il president franzos François Hollande ed il primminister talian Matteo Renzi.
Eveniment global
3'000 persunas èn engaschadas per che l'eveniment passia senza incaps. Radund 300 represchentants da medias rapportan da l'eveniment sin l'entir mund. Per la segirezza dals giasts procuran sper la polizia er 2'000 commembers da l'armada. Sur il territori dal Gottard vala in scumond da sgular per l'aviatica civila e militara.
#Gottardo2016 – in grond tema sin social media
RR novitads 06:00
