La crew dal helicopter dal tip Super-Puma na possia betg vegnir fatga responsabla per la disgrazia la fin da settember 2016 sin il Gottard. Quai è il facit da l'inquisitur militar, che ha investigà l'accident. Ils dus pilots eran morts tar la disgrazia, in ulteriur commember da la crew aveva survivì.
Il Super-Puma era sa tschentà cun ina delegaziun da l'OSZE en la vischinanza da l'ospizi dal Gottard. La delegaziun è partida ad ina visita d'in indriz militar ed il Super-Puma era apaina intginas secundas en l'aria che ses roturs han tutgà ina lingia libra. L'helicopter n'era betg pli manevrabel ed è crudà giu.
Uss mussan las inquisiziuns, ch'ils pilots hajan resguardà tut las prescripziuns e las lingias, ch'eran nudadas sin lur cartas – in cabel n'era betg nudà e quel haja causà la disgrazia.
Independent da quai, ch'ils pilots hajan accumplì lur lezia, recumonda l'inquisitur militar d'examinar, sche las prescripziuns d'atterrar en territoris sco quel da l'ospiz dal Gottard stoppian vegnir surlavuradas.
Il territori è gia uss marcà en las cartas da sgol sco territori «contaminà da cabels».
RR novitads 11:00