Gotthard: Benedì tunnel da basa

Spirituals da trais religiuns han da cuminanza fatg ina ceremonia en il culm avant l’inauguraziun uffiziala.

Tschintg sacerdots da las grondas religiuns e confessiuns en svizra benedeschan il tunnel dal Gottard. Els stattan en ritscha davon ina paraid. Bild in Lightbox öffnen.

Legenda da maletgs: Las grondas religiuns unidas en la benedicziun dal nov tunnel dal Gottard SRF

Il tunnel da basa dal Gottard è vegnì benedì mesemna a bun’ura. Spirituals da trais religiuns han da cuminanza fatg ina ceremonia en il culm avant l’inauguraziun uffiziala. Pader Martin Werlen ha springì l’uschenumnà tunnel da model cun aua benedida.

Dus kilometers sut terra han ils spirituals benedì il tunnel da basa ch’è mo intgins meters lontan. In pader, ina plevonessa, in imam ed in rabin han ensemen fatg oraziun per ils viagiaturs ed lavurers dal nov tunnel. Er in ateist è stà da la partida.

Cun questa ceremonia inter-religiusa vulan ils organisaturs accentuar quai che collia era er sin il sectur religius.

Per motivs da segirezza n’è la ceremonia betg stada en il tunnel sez, mabain en l’uschenumnà tunnel da model.

Oriundamain n’era betg planisà ch’in spiritual protestant sa participescha a la benedicziun. Quai aveva procurà per grondas cuntraversas, uschia ch’ils responsabels han surlavurà lur concept.

L'inauguraziun uffiziala è da mezdi.

RR actualitad 08:00