Alcohol donnegia, fimar era – ma co guardi ora cun medicaments durant la gravidanza e durant il temp che mammas dattan latg? Tge medicaments pon dunnas pigliar e quant ditg? La cuminanza da lavur svizra «Perinatale Pharmakologie» porta ensemen datas, gia dapi passa 10 onns.
Depakine vegn dal concern da farma franzos Sanofi, ed è dapi passa 50 onns sin il martgà. I sa tracta d'in medicament cunter epilepsia. Ma dunnas ch'èn en speranza na duessan betg prender quest medicament. Quel po numnadamain chaschunar impediments tar ils pops anc betg naschids. La Svizra registrescha dapi il 1990 cas pussaivels. Plirs tozzels cas èn gia vegnids annunziads.
Suenter lungas discussiuns na vul Swissmedic dentant betg scumandar en general il medicament. Il december 2018 ha Swissmedic adattà las indicaziuns d'avertiment tar Depakine, e tar auters medicaments che cuntegnan era la substanza activa Valproat. Plinavant vegn il tractament cumbinà cun in program da prevegnir a gravidanzas. Quai munta che dunnas che piglian in tal preparat ston far la segira ch'i na vegnan betg en speranza.
Lur presidenta, Ursula von Mandach, vul far visibel questa savida a tuts. Quai per pudair evitar en l'avegnir talas tragedias sco cun il medicament da Depakine. «Questa banca da datas pudess cuntegnair tabellas e glistas per medicaments ed en tge dosa e cun tge indicaziuns ch'els èn adattads u betg adattads per dunnas en gravidanza.» Pia avertiments, ma er indicaziuns cura ch'in medicament sto vegnir dosà auter.
Banca da datas analoga per medischina d'uffants
Il metabolissem sa mida durant la gravidanza ed ils pli paucs medicaments èn testads per questa situaziun. Tuttina n'è l'idea d'ina tala banca da datas fin uss betg vegnida persequitada da la politica. Dacurt han ins dentant stgaffì ina tala banca da datas cun propostas per dosar e terapias en la medischina d'uffants e quella vegn er sustegnida da la Confederaziun e dals chantuns.
Perquai vegn Ursula von Mandach fitg clera: «Jau crai ch'il temp per la politica, da sa fatschentar cun questa tematica è gia retardà.» Sia gruppa da lavur è en discurs cun l'Uffizi federal per sanadad e vul era sa drizzar envers parlamentaris.
La presidenta da la cumissiun da sanadad dal Cussegl naziunal, Ruth Humbel (PCD) è da l'avis ch'i vala la paina da tractar l'idea. La Svizra saja davosen cun registers e bancas da datas. La cumissiun sa fatschentia la fin schaner cun las consequenzas dal medicament d'epilepsia Depakine, uschia Humbel.
Uffizi federal da sanadad beneventa l'idea
Er l'Uffizi federal da sanadad è consternà dals eveniments pervi da Depakine e beneventa perquai che la chaussa vegn elavurada uschè svelt sco pussaivel. Damai ch'il privel tar Depakine saja dentant stà enconuschent, n'è il BAG betg persvas ch'ina banca da datas avess pudì purtar insatge.
En general beneventa il BAG dentant la lavur da la gruppa da lavur sco era che la banca da datas per la medischina d'uffants possia vegnir schlargiada sin ulteriurs champs, scriva il BAG sin dumonda da SRF. Sco emprim vulan els dentant anc analisar l'emprima banca da datas – en radund in onn.
RTR novitads 17:00