Grevs urizis han laschà crescher las auas en Svizra

Ils urizis e la plievgia dapi venderdi han purtà bler aua, chametgs e granella. En il Muotathal en il chantun Sviz è in um sparì. En Germania è in tren siglì or dal binari pervi d'ina bova.

chasa cun l'aua fin a l'esch Bild in Lightbox öffnen.

Legenda da maletgs: Sco qua a Muttenz (BL) ha la plivegia intensiva laschà crescher las auas, uschia che blers tschalers èn vegnids inund... Keystone

En Svizra è vegnì registrà dapi venderdi passa 100'000 chametgs. Tenor SRF Meteo èn enturn 70'000 da quels pitgads en la terra. Local han ils urizis purtà granella. Il problem principal è dentant stà la ferma plievgia. Il quantum è stà fitg aut - e quai sin in terren ch'è gia dapi emnas sazià.

I ha dà numerusas annunzias da donns pervi da vias inundadas e tschalers plains. Quai cunzunt en ils chantuns Basilea champagna, Friburg, Sviz, Lucerna, Turitg, Son Gagl e Schaffusa.

Muotathal: um vegnì stratg tras l’aua or da ses auto

Ina via plain aua ad Unterterzen. Avrir maletg en lightbox.

Legenda da maletgs: Ils urizis han laschà ir surora ils auals ad Unterterzen (SG). Keystone

En il chantun Sviz è in um sparì sonda suenter grevas malauras. Pervi d'ina bova èn dus auals ids surora. L'um da 67 onns ch'era sin via cun ses auto è vegnì tschiffà da l'aua e stratg en il flum. Tenor la polizia è el vegnì tratg or da l'auto e svanì en las undas. Las forzas da salvament han instradà svelt ina tschertga, dentant senza success.



Germania: accident da tren e plievgia intensiva la sonda

Ina vista totala dal tren cun la locomotiva ch'è siglida or dal binari. Avrir maletg en lightbox.

Legenda da maletgs: En Germania è in tren siglì or dal binari pervi dad ina bova. Keystone

Er en la Germania hai pluvì intensiv. En il stadi federativ Rheinland-Pfalz è sonda in tren ì sur ils binaris ora pervi d'in sbuvaditsch. Tenor la polizia èn 10 persunas vegnidas blessadas, tranter quellas il locomotivist. Il tren era en viadi da Koblenz vers Frankfurt. Pir avant in mais era in tren regiunal a Trier ì sur ils binaris ora pervi da fermas malauras.

RR novitads 06:00