Siglir tar il cuntegn

Svizra Grippa d'utschels en il Vallais

La grippa d'utschels ha entant er cuntanschì il Vallais. A Chablais a la riva dal nord dal Lai da Genevra han ins chattà tschintg utschels crappads, tar ils quals il virus H5N8 ha pudì vegnir cumprovà, scriva il chantun Vallais.

Purtret da dus umens che tignan in satg da rument e mettan  en quel in utschè.
Legenda: Dus umens dismettan in utschè ch'è mort da la grippa d'utschels. Keystone

Gia la fin d'emna eran vegnids cumprovads plirs cas al Lai da Genevra. Silsuenter han ins chattà plirs utschels crappads als Lais da Neuchâtel e da Bienna.

Sinaquai ha l'Uffizi federal per la segirezza d'alimentaziun augmentà las mesiras da protecziun. A partir dals 16 da november 2016 ston giaglinas ed andas vegnir pavladas en stalla.

Virus sa derasa

La mesemna era il virus da la grippa d’utschels er vegnì cumprovà al Lai da Bienna. Sco la direcziun per economia publica dal chantun da Berna aveva scrit, sajan vegnids chattads utschels crappads a Teuffelen ed a Bienna.

Uschia saja in ulteriur grond lai, ultra dal Lai da Constanza, Genevra e da Neuchâtel, pertutgà da la grippa d’utschels.

Il mardi avevan las autoritads federalas decis da rinforzar las mesiras da protecziun. Uschia ston il mument tut ils possessurs da giaglinom tegnair ils animals en stalla.

Tenor la savida actuala n’è il virus betg privlus per umans.

Avant radund diesch dis era la grippa dal tip H5N8 vegnida registrada per l'emprima giada al Lai da Constanza. Là èn crappads enfin uss radund 80 utschels selvadis da la grippa. La malsogna vegn importada d'utschels migrants che sa ferman adina puspè durant lur viadi en ils quartiers d'enviern.

RR novitads 20:00 / RR novitads 14:00, 17.11.2016