L'universiada d'enviern – l'occurrenza sportiva planisada il december 2021 en la Svizra Centrala ed en il Grischun ed abolida a curta vista – custa 26 milliuns francs. Trais quarts dals custs, passa 20 milliuns surpiglia il maun public – tenor las indicaziuns dals organisaturs. Bunamain 6 milliuns francs fan or las finanzas, segiranzas e taxas.
Ils organisaturs vesan tuttina effects positivs. Las investiziuns en infrastructura stettian a disposiziun per autras occurrenzas. Bunamain 4 milliuns francs sajan vegnids investids en ils lieus d'occurrenza. Plinavant hajan ins sviluppà savida e chapientscha per organisar occurrenzas decentralas cun pliras disciplinas sportivas.
Corona aveva sfurzà d'annullar l'universiada. A Lantsch avess gì lieu il biatlon e la cursa d'orientaziun. A San Murezzan ina part da las cursas da skis. 1'600 studentas e students ord 54 pajais fissan stads da la partida.
