Siglir tar il cuntegn
cuntegn

Svizra Grischun – eroport ZRH en directa

A partir dals 9 da december survegn il Grischun ina nova colliaziun directa cun l’eroport da Turitg. La colliaziun va mintg’ura sur la lingia Cuira–Son Gagl–Winterthur–eroport. Ina communicaziun da la regenza renda attent a questa ed autras midadas per il Grischun tras l’urari nov.

Legenda: Tadlar il audio Las midadas da l'urari – la survista en in minut:. Durada 00:53 minutas.
00:53 min, Actualitad dals 05.12.2018.

Ils 9 da december mida l’urari. En ina communicaziun a las medias resumescha la regenza las midadas impurtantas per il Grischun. En emprima lingia renda ella attent a la colliaziun directa cun l’eroport da Turitg, dentant er a dapli curs da l’auto da posta Cuira–Bellinzona, in tren dapli Landquart–Engiadin’Ota e trens supplementars S12 Cuira–Sargans durant la notg.

GR e midadas SBB & Thurbo

Personen-Box aufklappenPersonen-Box zuklappen
GR e midadas SBB & Thurbo
  • 06:12 fin 20:12 mintg'ura da Cuira sur Son Gagl fin a l'eroport da Turitg senza stuair midar tren. Il REX (Rheintalexpress) tranter Cuira e Wil SG survegn dapli valur e daventa il IR13.
  • La purschida da la S12 Sargans – Cuira vegn adattada ed extendida la saira. Da nov circulescha la S12 a las 23:06 ed a las 00:06 da Sargans fin a Cuira sco er a las 23:31 ed a las 00:31 da Cuira fin a Sargans. Percunter scroda la S12 che partiva da Sargans a las 23:36 e da Cuira a las 00:01.
  • La sondas e la dumengias curseschan durant la stagiun auta IC supplementars sin il traject Turitg – Cuira.

Midadas Viafier retica VR

Personen-Box aufklappenPersonen-Box zuklappen
Midadas Viafier retica VR
Legenda:Keystone
  • La colliaziun existenta da Landquart a Claustra Plaz en direcziun da l'Engiadin'ota vegn prolungada da glindesdi fin venderdi: partenza da Landquart a las 19:20, partenza da Claustra Plaz a las 20:02, arrivada a Samedan a las 21:07. Grazia a questa communicaziun exista per il ICE da Hamburg / Turitg, che parta a las 18:07 da Turitg, ina colliaziun en l'Engiadina bassa.
  • Tranter Cuira ed Arosa vegnan integrads – durant las fins d'emna d'enviern cun grondas frequenzas – trens spezials en l'urari ordinari. Quels curseschan senza fermar en las staziuns intermediaras da questa lingia: partenza da Cuira a las 08:38, partenza d'Arosa a las 16:18 (las dumengias dals 23-12-2018 fin ils 03-02-2019, las sondas e las dumengias dals 09-02-2019 fin ils 03-03-2019 sco er ils 10-03-2019); partenza da Cuira a las 12:38 – partenza d'Arosa a las 11:18 (las sondas dals 09-02-2019 fin ils 02-03-2019).
  • Il Bernina express 961/960 circulescha da nov da Landquart sur Tavau fin a Tirano e viceversa: partenza da Landquart a las 08:37, arrivada a Tirano a las 13:33; partenza da Tirano a las 15:13, arrivada a Landquart a las 20:13.
  • La staziun «Chur Stadt» survegn il nov num «Chur Altstadt». Questa designaziun facilitescha l'orientaziun a persunas che n'enconuschan betg bain il lieu. Er «Seewis-Valzeina» survegn in nov num, numnadamain «Seewis-Pardisla». D'ina vart perquai che la staziun è situada a Pardisla, ina fracziun da Seewis. Da l'autra vart perquai che persunas, che vulan viagiar a Valzeina, bandunan il tren a Grüsch e betg a «Seewis-Valzeina».
  • Da resguardar è la serrada totala dal traject tranter Susch e Scuol-Tarasp dals 11 da mars fin ils 7 da settember 2019. Lura curseschan bus da cumpensaziun tenor in urari spezial.
  • Pervia d'ina adattaziun dal sistem tecnic resultan plinavant a partir dals 9 da december 2018 novas minutas da partenza sin staziuns pli pitschnas da la Viafier retica.

GR e midadas tar ils bus

Personen-Box aufklappenPersonen-Box zuklappen
GR e midadas tar ils bus
Legenda:Keystone
  • Dus novs curs da l'auto da posta sin la lingia Cuira – Bellinzona permettan d'arrivar pli baud en il Mesauc / Tessin respectivamain da turnar pli tard a Cuira: partenza da Cuira a las 06:55, arrivada a Bellinzona a las 08:50; partenza da Bellinzona a las 20:45, arrivada a Cuira a las 22:45.
  • Sin tut las colliaziuns Cuira – Bellinzona è vegnida stgaffida da nov ina purschida contingentada da bigliets da spargn. Durant la stagiun auta cursescha las sondas en tuttas duas direcziuns in curs «Direttisima» senza fermada tranter Cuira e Bellinzona, cun bunas colliaziuns davent da Bellinzona a Milaun.
  • En Engiadin'ota vegn stgaffì in nov concept da bus che cumbinescha da nov lingias da bus existentas. Uschia resultan frequenzas pli spessas, tranter auter in tact da 10 minutas tranter San Murezzan Vitg sur San Murezzan Bogn fin a la pendiculara dal Corvatsch.

I dà ulteriuras amplificaziuns da la purschida – e quellas dettia quai quasi en mintga regiun, scriva la regenza e numna:

  • per la Bregaglia ina nova colliaziun a bun'ura cun San Murezzan,
  • per la regiun Landquart ina nova colliaziun da bus per l'emprim IC che parta a las 05:19 per Turitg,
  • per la regiun Plaun in nov bus da notg la saira tard fin a Razén,
  • per l'Engiadina bassa in bustaxi fin en la vischnanca da Valsot.

RR novitads 12:00