En ils bogns averts dal Grischun e Glaruna è la qualitad da l'aua per part manglusa. Quai resulta da las provas ch'ils controlladers d'aua han fatg questa stad en 23 bogns averts dals dus chantuns. Da tut en tut 36 provas sajan 15 stadas problematicas, communitgescha l'Uffizi per la segirtad da mangiativas e la sanadad d'animals.
Savens saja stà memia bler chemia en l'aua. Surtut il chlor e la valur da pH crititgeschan ils controlladers. La valur maximala per il chlor che vegn duvrà per dischinfectar l'aua è vegnida surpassada en nov cas – la valur da pH (quant alcalic u acid che l'aua è) vegn crititgà en tschintg cas. En singuls cas era l'aua memia turbla, cuntegneva trihalometans u carbamids.
Ils bogns pertutgads hajan ussa da meglierar lur atgnas controllas e manaschis, scriva l'Uffizi per la segirtad da mangiativas e la sanadad d'animals dals dus chantuns. Ultra da quai hani da far ulteriuras analisas da l'aua per confermar il success da las mesiras.
