En il Grischun custa in'abitaziun da 100 meters quadrat en media 2'400 francs il mais. Quai è plazza 7 da l'entira Svizra. Il pli bler custan las abitaziuns en media en il chantun Genevra cun passa 3'400 francs – il pli pauc en il chantun Giura cun 1'500 francs. Quai rapporta il Sonntagsblick.
El sa basa sin in'analisa da la firma da cussegliaziun d'immobiglias «yazi». Quella ha analisà radund 95'000 inserats dapi l'entschatta da l'onn. En general mussa l'analisa ch'il dumber d'abitaziuns propi charas – pia quellas nua che 100 meters quadrat custan 2'900 francs ed ensi, è s'augmentà da 49% sin 57%. Abitaziuns bunmartgadas d'enfin 1'250 francs sin 100 meters quadrat datti pli e pli paucas.
