Citads, vischnancas, chantuns e la Confederaziun vulan promover l’engrondiment da raits termicas en Svizra. La ministra d’energia Simonetta Sommaruga e represchentants chantunals e communals han suttascrit ina charta en chaussa.
Il potenzial dal provediment da chalur tras raits termicas saja grond, hai num en ina communicaziun dal Departament federal per ambient, traffic energia e communicaziun. Dentant na vegnia quest potenzial anc betg tratg a niz avunda, perquai ch’i saja ina chaussa fitg cumplexa da projectar e realisar raits termicas. In exempel è la chalur a distanza. Sin basa da la charta duaja durant trais onns vegnir sviluppà manuals per realisar tals projects.