Siglir tar il cuntegn

Header

cuntegn

Grond schluccament davent d'oz In zic normalitad turna

A partir dad oz vegn puspè instruì en scolas e scolinas. Las fatschentas, ils restaurants, museums e bibliotecas pon avrir lur portas ed il traffic public cursescha tenor urari normal.

Quai na vul dentant betg dir che tut saja puspè sco pli baud. Ordaifer las atgnas quatter paraids èsi da tegnair 2 meters distanza. En las stizuns dastgi avair mo ina persuna sin 10 meters quadrat. En ils restaurants dastgan mo 4 persunas u ina famiglia seser vid ina maisa. Tranter las maisas dovri ina distanza minimala u ina paraid da separaziun. Era sport en gruppas e fin 5 persunas è puspè lubì.

Viagiar gea, dentant mo sch'i sto esser

Auter ch'en scolas èn dapertut mesiras d'igiena sco era distanza prescrittas. Tgi che sa, duai vinavant lavurar a chasa quai per impedir ina fulla da glieud en il traffic public. Vinavant serrà restan fin l'entschatta da zercladur kinos, casinos e campadis. I n'è betg duair da purtar mascras d'igiena, vegn dentant cusseglià en bus e tren. Ed er sch'ins dastga puspè viagiar recumondan las autoritads da far quai mo sch'i sto esser, evitar temps da fulla e resguardar las reglas da distanza.

Scola gea, dentant mintga chantun ha autras reglas

En scola datti en mintga chantun autras reglas. En il Grischun duess l'instrucziun succeder uschè normal sco pussaivel. Ils uffants na ston betg tegnair distanza in da l'auter. Auters chantuns entschaivan mo cun mesas classas.

Tabella.
Legenda: Schluccament da las mesiras RTR

Fatschentas sa preparan sin il di d'avertura

video
Ina reavertura cun dumondas
Or da Actualitad dals 11.05.2020.
laschar ir. Durada: 3 minutas 57 Secundas.

RTR novitads 06:00

Artitgels legids il pli savens