Siglir tar il cuntegn
Inhalt

Svizra Gronda critica envers reveder la lescha dal servetsch civil

Gronda critica envers la revisiun planisada da la lescha per il servetsch civil. I saja ina revisiun che fetschia donn a l’economia ed a l'entira societad. Quai ha ditg oz l’uniun dal servetsch civil CIVIVA ensemen cun autras organisaziuns.

fotografia d'ina persuna che fa servetsch civil
Legenda: Il servetsch civil è memia attractiv per ils ins, per ils auters memia pauc attractiv. Keystone

La proposta d'engrevgiar la lubientscha per far servetsch civil, na vegnia betg ad augmentar l'attractivitad da l'armada, uschia han ditg ils adversaris da la revisiun avant las medias. Civiva ponderescha da prender il referendum cunter la revisiun planisada dal servetsch civil.

Tgi surpiglia la lavur?

Las persunas che fetschian servetsch civil prestian ina gronda lavur en Svizra, en spezial en las spartas socialesser, sanadad ed ambient ha ditg la cussegliera naziunala Lisa Mazzone Verds/GE. Passa 5'000 instituziuns porschian plazzas per far servetsch civil, latiers tutgan er chantuns e vischnancas.

Las propostas dal Cussegl federal mettan en dumonda il dretg da far servetsch civil.
Autur: Lisa MazzoneCussegliera naziunala Verds/GE

La Confederaziun flaivlentia in sistem che funcziunia bain senza mussar alternativas, ha avertì Thomas Honegger da l'uniun Konkret. Ins na dastgia betg opponer in a l'auter il servetsch civil al servetsch militar. I saja chastiabel da vulair schliar il problem d'in servetsch cun stuschar il problem sin tschel servetsch, ha ditg la cussegliera naziunala Rosmarie Quadranti PBD/ZH.

Servetsch civil chatta adina dapli interess

Cun la revisiun vul il Cussegl federal engrevgiar la midada dal servetsch militar al servetsch civil. El fa propostas per sbassar il dumber da permiss.

Cun dischmetter l'examen da conscienza il 2009 è il servetsch civil vegnì pli attractiv. Eri l'onn 2008 anc 1'632 permiss è il dumber s'augmentà il 2009 sin 6'720. L'onn passà èsi stà 6'785 permiss.

RR novitads 12:00