A Giffers èn bunamain 1'000 persunas sa radunadas a chaschun d'ina saira d'infurmaziun dal chantun. Tals projects leventian l'emprim adina resistenza, ha ditg la vicedirectura dal Secretari statal per migraziun, Barbara Büschi. Cura che l'alloschi saja en funcziun, sa quieteschia l'agitaziun per il solit dentant spert.
La decisiun per il lieu, l’institut Guglera a Giffers, na saja betg stada arbitrara, ha ditg la cussegliera guvernativa Anne-Claude Demierre. Anzi saja quai stà il sulet lieu che haja ademplì tut las pretensiuns da la Confederaziun.
Davent da l’onn 2017 duai l’alloschi en in dals bajetgs da l’institut dar suttetg a fin a 300 requirents d’asil. La vischnanca da Giffers dumbra var 1’500 abitants.
Avant la decisiun per quest lieu n'aveva il chantun betg consultà las autoritads da la vischnanca da Giffers. Quellas èn vegnidas infurmadas ils 9 da favrer da la Confederaziun e dal chantun da Friburg.
RR Novitads 22:00