Siglir tar il cuntegn

Header

cuntegn

Svizra Gronds donns suenter plievgia intensiva

En il Vallais ha plievgia intensiva chaschunà gronds donns. A St-Gingolph ha il flum Morge inundà pliras vias e donnegià cun la glera vehichels e chasas.

Dus restaurants e plirs vehichels sajan vegnids donnegiads, ha ditg il president da vischnanca da St. Gingolph, Bertrand Duchoud. 15 persunas hajan stuì vegnir evacuadas. Blessà na saja dentant nagin.

Tschalers, garaschas e vias sut aua

Tranter Troistorrents e Val-d'Illiez è la via stada serrada pervi dal privel da bovas. Ed a Monthey aveva la polizia evacuà 300 persunas che vivan per lung da la Vièze. Entant han ellas puspè pudì turnar en lur chasas.

Er en il chantun Berna procura la plievgia per inundaziuns. Dapi ier saira ha la polizia survegnì passa 250 annunzias da donns. Numerus tschalers, garaschas e vias sajan sut l'aua, ha confermà Alice Born, la pledadra da la polizia chantunala da Berna. Per part dettia er glera sin las vias. Divers auals sajan ids suror.

Uschè blera aua sco anc mai

A Genevra avertescha la polizia da betg s'avischinar memia fitg al flum Arve che mainia tant'aua sco anc mai dapi las mesiraziuns dal 1935.

La polizia dal chantun Solothurn noda 160 annunzias da donn. En la regiun da Bienna ed en l'Argovia Sura ha i dà passa 250 annunzias.

RR novitads 12:00/14:00

Artitgels legids il pli savens