Siglir tar il cuntegn

Header

Navigaziun

Chanaster da far cumpras mellen dal Volg davant in regla cun products fraids.
Legenda: Malgrà pli paucas stizuns ha il Volg pudì augmentar la svieuta per 1,4% sin passa 1,5 milliardas francs. Keystone
cuntegn

Svizra Gruppa Volg ha augmentà la svieuta

Il detaglist Volg ha pudì augmentar l'onn passà la svieuta, malgrà ch'il dumber da filialas è sa reducì levamain. Dapli rauba han surtut las butias da tancadis vendì. Las butias dal vitg restan la pitga da la gruppa.

Concret ha l'entira gruppa Volg fatg il 2018 ins svieuta dad 1,51 milliardas francs. Cumpareglià cun l'onn avant è quai in plus dad 1,4%. Il dumber da posts da vendita è l'onn passà sa diminuì per sis sin 924 stizuns, shops da tancadis e detaglists libers.

Dapli rauba ha il detaglist surtut pudì vender en butias da tancadis. La svieuta dals 94 «TopShops» als tancadis dad Agrola è creschida per 5,1% sin 270 milliuns francs. Il pli impurtant chanal da vendita restan las butias dal vitg da Volg. Tut las 588 da questas butias han pudì augmentar la svieuta per 1,8% sin 1,15 milliardas francs. En media ha ina butia dal vitg uschia fatg ina svieuta da 1,96 milliuns francs. In pli pauc bun onn han ils detaglists libers che vendan products da Volg gì. Els han fatg bun 13% damain svieuta – en tut anc 85 milliuns francs.

RR novitads 10:00