Avant che retschaiver uffants or da l'Ucraina, sco communitgà il fanadur, ston las autoritads anc sclerir inqual dumonda. In termin fix per ils transports na dettia anc betg. Ils 155 uffants dovrian numnadamain tgira ed accumpagnament intensiv, ha ditg il secretari da la Conferenza dals directurs da sanadad chantunals, Michael Jordi.
Tut tenor tge tgira ch'ils uffants basegnan, vegnian en dumonda ospitals, clinicas da rehabilitaziun u chasas d'uffants. Damai ch'ils uffants vivan actualmain en Ucraina en gruppas, duain quels uffants er vegnir transportads ensemen, per uschia betg strapatschar els anc pli fitg.
Segn da dumonda tar ils custs
Tenor Jordi sa mussia bain plaunet che la Direcziun per svilup e collavuraziun (Deza) ed il corps per agid umanitar surpiglian ils custs da viadi per ils uffants, fertant ch'il servetsch da sanitad coordinà surpiglia la coordinaziun. Grazia al status da protecziun S, èn ils uffants che vegnan en Svizra assicurads. Sch'ils uffants vegnan dentant en ina instituziun sco ina chasa d'uffants, saja anc da sclerir tgi che surpiglia ils custs, haja gì num tar la Conferenza dals directurs socials. I vegn er anc sclerì sche persunas da l'Ucraina che viageschan ensemen cun ils uffants, pon surpigliar tscherts pensums. Tgi che surpiglia la finala ils custs, dependia tranter auter er da la dimora, ha declerà Jordi.
Dumonda uffiziala per trametter 155 uffants
Il fanadur hajan ins survegnì ina dumonda uffiziala da l'ambassada ucranaisa, en quella vegnia garantì ch'ins na tramettia betg commembers da l’armada en Svizra. Quai ha midà la situaziun, aveva declerà Johannes Matyassy dal Departament federal d'affars exteriurs EDA envers la Tagesschau da SRF. Per il mument vul l'Ucraina trametter 155 uffants, ch’han problems cun la sanadad per in tractament en Svizra. L'Uffizi federal da sanadad sto anc approvar ils transports.
Neutralitad na saja betg pli periclitada
La Confederaziun era l'emprim encunter da prender si blessads da guerra pervia da la neutralitad da la Svizra. Tenor quella na dastgan schuldads blessads ch’èn vegnids tgirads en Svizra betg pli participar a la guerra. Ils schuldads na dastgan betg pli turnar en l’Ucraina suenter ch’els èn guarids. Tar civilistas e civilists percunter na saja quai nagin problem.
Il EDA vice-secretari da stadi Johannes Matyssay ha declerà quai uschia, ch'oriundamain avevi num che l'Ucraina decidi tge blessads che vegnan en Svizra. I vess pudì esser civilists u schuldads. Uss saja la situaziun autra. L'ambassada ucranaisa ha tramess ina brev a la EDA nua ch'i vegn garantì ch'i na vegnan nagins schuldads en Svizra.
Il Veto da la Confederaziun ha chaschunà critica tar differentas varts. Era perquai ch'ils chantuns eran averts da prender si blessads da l'Ucraina.