1500 fin 2000 umans s'han participads sonda suentermezdi a Genevra ad in'ulteriura demonstraziun per sustegnair il pievel palestinais. Arrivà da la Frantscha era Jean-Luc Mélenchon, il schef da la partida sanestra da La France Insoumise.
Secziuns da la partida en Frantscha vischina avevan inizià la radunanza ensemen cun differentas autras organisaziuns, cun sindicats e collectivs per sustegnair la Palestina. Dal Palais Wilson han ils demonstrants tratg a la Place des Nations davant la sedia da las Naziuns Unidas, nua ch'els han tratg si bandieras e scandà slogans per sustegnair la Palestina.
Il cortegi da demonstraziun al qual 1400 persunas èn sa participadas tenor stimaziuns da l'agentura da novitad Keystone-SDA è capità senza incaps. Sin questa manifestaziun hai dà numerus pledoyers da las oraturas e dals oraturs svizzers sco era da la Frantscha che han pretendì «in armistizi immediat e duraivel a Gaza», «la fin dal reschim d'apartheid», «la fin dal genocid al pievel palestinais» u er «la fin da la construcziun d'abitadis en la Cisjordania».
