Siglir tar il cuntegn

Header

Navigaziun

Legenda: Tadlar il audio Saira: Cussegl naziunal – Debatta gulivaziun da finanzas. Durada 03:52 minutas.
Or da Actualitad dals 07.05.2019.
cuntegn

Gulivaziun da finanzas Chantuns urbans duajan survegnir dapli daners

Il Cussegl naziunal ha franà l'offensiva dals chantuns muntagnards. Las citads duajan survegnir dapli indemnisaziuns.

Il Cussegl naziunal ha franà l'offensiva dals chantuns muntagnards tar la refurma da la gulivaziun da finanzas. Las citads duajan survegnir dapli indemnisaziuns.

  • Chantuns urbans duajan vegnir distgargiads cun la nova concepziun da la gulivaziun da finanzas
  • Suenter il Cussegl dals chantuns ha uss er il Cussegl naziunal approvà il nov cumpromiss
  • La decisiun è crudada cun 158 cunter 28 vuschs tar 8 abstenziuns
  • Ils chantuns muntagnards n'èn betg stads d'accord cun la repartiziun dal respargn

Cun la nova concepziun da la gulivaziun da finanzas e da las incumbensas (NGF) vegnian ils chantuns pli ferms distgargiads. Ils chantuns e la Confederaziun èn sa cunvegnids suenter onns da discussiun sin in cumpromiss. Cun il cumpromiss spargna era la Confederaziun daners. Il respargn munta a radund 280 milliuns francs ad onn.

La mesadad dals daners duai vegnir duvrada per sustegnair ils chantuns pli flaivels durant in temp da transiziun. Quels ston desister pervia da la refurma sin tschients milliuns. L'autra mesadad, pia 140 milliuns francs, va en la gulivaziun socialdemografica. Da quels daners duajan era tscherts custs dals centers urbans vegnir gulivads. Suenter il Cussegl dals chantuns ha era il Cussegl naziunal approvà cun 158 cunter 26 vuschs quella schliaziun.

Repartiziun da daners sco punct da dispita

La decisiun co reparter il respargn aveva chaschunà per discussiuns. Ils chantuns muntagnards avevan pretendì ch'ils meds da respargn vegnian repartids egual tranter la gulivaziun socialdemografica e topografica. La gulivaziun topografica va numnadamain cunzunt en favur dals chantuns muntagnards. Quels ston quintar entras la NGF cun perditas da passa 500 milliuns francs.

La repartiziun dal respargn giaja dentant memia lunsch hai gì num or da las retschas dals chantuns muntagnards. Tar l'introducziun da la gulivaziun da finanzas sajan ils daners vegnids repartids egual sin la gulivaziun socialdemografica e topografica. Quai na levan ils chantuns cun paucas entradas betg midar. Il Cussegl naziunal è a la fin dentant stà dad in'auter avis.

RR actualitad 17:45