Il politicher da la PPS che ha 60 onns è l'emprim cusseglier federal che sto en quarantina pervi dal virus. Tenor il vicechancelier federal André Simonazzi ha Guy Parmelin gì contact cun ina persuna dal secretariat general dal departament, ch'è pli tard vegnida testada positiv sin corona.
Il cusseglier federal ha gì in resultat negativ dal test, e na mussa nagins simtoms da covid-19. El stat per diesch dis a chasa en quarantina e fa home-office.
Betg il sulet departament pertutgà
Er en auters departaments sa derasa il virus, sco il Tages-Anzeiger ha scrit la mesemna. Or dal conturn dal ministeri da giustia da Karin Keller-Sutter sajan gia duas persunas vegnidas testadas positiv sin il virus. Ina mez settember ed ina l'emna passada. Il mument sa chattian duas persunas dal secretariat general, pia dal circul pli stretg enturn la cussegliera federala en quarantina, scriva la gasetta. Karin Keller-Sutter sezza è dentant sa participada a la sesida, cun ella giaja bain, ha declerà ses pledader.
