Siglir tar il cuntegn

Header

cuntegn

Guy Parmelin «Svizra sto analisar flaivlezzas dal federalissem»

La Svizra sto analisar las flaivlezzas dal federalissem en temp da crisa per esser preparada meglier per sfidas futuras. Da quest avis è il president da la Confederaziun partent, Guy Parmelin.

Per exempel stoppia l’interacziun dals divers plauns statals vegnir optimada. En l’intervista cun la «SonntagsZeitung» ha Parmelin fatg cler ch’i saja temp da trair las conclusiuns da la pandemia. Bain saja il federalissem ina pitga da sustegn da la Svizra, dentant saja el gist en temp da crisa mintgatant er plaun e cumplitgà.

Sco exempel ha el numnà las mesiras da corona ch'il Cussegl federal haja proponì e silsuenter stuì trametter en consultaziun als chantuns. En quest cas na possia la regenza betg agir avunda spert e gist sch'i stoppia ir svelt na saja quai betg ideal.

Taskforce pretenda dapli mesiras

Entant pretendan commembers da la Taskforce scientifica dal Cussegl federal da prender ulteriuras mesiras per franar la derasaziun da la varianta omicron. I saja da quintar che omicron daventia ils proxims dis la varianta dal coronavirus predominanta, ha ditg Tanja Stadler, la scheffa da la Taskforce, en l’intervista cun la «NZZ am Sonntag».

Concret recumondia la Taskforce da serrar clubs u dad annullar partys da Sivlester. Per dar dumogn a la situaziun saja necessari da reducir pli fitg ils contacts, d’augmentar il tempo da vaccinar e da testar dapli che quai saja actualmain il cas.

RTR novitads 09:00

Artitgels legids il pli savens

Scrollar a sanestra Scrollar a dretga